Ўзбекистон терма жамоаси ўртоқлик учрашувида Уругвайга 1:2 ҳисобида мағлуб бўлди

Тошкент, Ўзбекистон (UzDaily.uz) — Ўзбекистон миллий футбол терма жамоаси Малайзияда бўлиб ўтган ўртоқлик учрашувида Уругвай терма жамоасига 1:2 ҳисобида ютқазди.

Биринчи бўлимда уругвайликлар ўйинни тўлиқ назорат қилдилар, аммо танаффус арафасида ўзбекистонлик футболчилар бир нечта хавфли вазият яратишга муваффақ бўлдилар.

51-дақиқада Уругвай тезкор қарши ҳужум орқали ҳисобни очди — тўпни Факундо Торрес дарвозага йўллади. Гол киритилгандан сўнг Ўзбекистон терма жамоаси фаоллашди ва ҳисобни тенглаштириш имконига эга бўлди, бироқ Элдор Шомуродовнинг бош билан йўллаган зарбасини уругвайлик дарвозабон қайтариб қолди.

Шундан сўнг рақиб жамоа тезкор ҳужумлар орқали хавф туғдиришни давом эттирди ва 60-дақиқада Хуан Мануэль Санабриянинг голи орқали устунликни икки баробар оширди. 72-дақиқада ўзбекистонликлар яна бир имконият яратдилар, аммо зарба кучсиз чиқди ва тўп дарвозабон томонидан ушлаб қолинди.

82-дақиқада Русланбек Жиянов Уругвай дарвозасига гол урди ва ҳисобни 1:2га етказди. Қолган дақиқаларда Ўзбекистон терма жамоаси ҳисобни тенглаштириш учун ҳаракат қилди, аммо уругвайликлар ғалабани сақлаб қолишга муваффақ бўлдилар.