Тошкент, Ўзбекистон (UzDaily.uz) — 2025 йил январь ойида Ўзбекистон текстиль маҳсулотлари халқаро бозорида ўз позициясини мустаҳкамлашни давом эттирди. Миллий статистика қўмитаси маълумотларига кўра, текстиль экспорти 198,5 миллион АҚШ долларини ташкил этди, бу эса мамлакат умумий экспорт ҳажмининг 15,2%ига тенг.

Экспортдаги асосий улуш тайёр текстиль маҳсулотларига тўғри келиб, уларнинг қиймати 88,6 миллион долларга етди. Шунингдек, экспорт ҳажмида пряжа (70,9 миллион доллар) ва трикотаж матолар (23,0 миллион доллар) ҳам салмоқли ўрин тутади. Бундан ташқари, хорижий харидорлар ўзбек матолари (11,6 миллион доллар), пайпоқ маҳсулотлари (2,7 миллион доллар) ва гилам маҳсулотларига (1,7 миллион доллар) юқори талаб билдиришмоқда.

Бу рақамлар Ўзбекистон текстиль саноатининг жадал ривожланаётганидан ва халқаро бозорда рақобатбардошлигини ошираётганидан далолат беради. Соҳа муваффақиятлари ишлаб чиқаришнинг модернизация қилиниши, янги технологияларнинг жорий этилиши ва маҳсулот турларининг кенгайиши билан боғлиқ.

Муттахассислар таъкидлашича, Ўзбекистон текстиль саноати барқарор ўсишни намоён этмоқда ва бу мамлакат иқтисодиётига валюта тушумини оширишга ҳисса қўшмоқда. Республика ҳукумати бу соҳани янада ривожлантиришни режалаштирмоқда, бу эса экспорт салоҳиятининг янада ошиши учун янги имкониятлар яратади.