Ўзбекистон Ташқи ишлар вазирлиги Исроилдаги фуқароларни хавфсизлик чораларига риоя қилишга чақирди

Тошкент, Ўзбекистон (UzDaily.uz) — Ўзбекистон Республикаси Ташқи ишлар вазирлиги Исроил Давлатида яшаб турган ўз фуқароларига минтақадаги беқарор вазият билан боғлиқ ҳолда шахсий хавфсизлик чораларига қатъий риоя қилиш бўйича тавсиялар билан мурожаат қилди.

Расмий хабарда таъкидланишича, Исроилдаги вазият тез ўзгариши мумкин, шу боис Ўзбекистон фуқароларига маҳаллий ҳокимиятлар ва мамлакатнинг расмий идоралари кўрсатмаларига сўзсиз амал қилиш тавсия этилади.

Ўзбекистон фуқароларига одамлар оммавий тўпланадиган жойлардан қочиш, серодам ҳудудларда узоқ вақт қолмаслик, шунингдек, сафарларни эҳтиёткорлик билан режалаштириш, айрим ҳудудларга боришни вақтинча тўхтатиш имкониятини кўриб чиқиш маслаҳат берилмоқда.

Шунингдек, шахсни тасдиқловчи ҳужжатларни доимо ўз билан олиб юриш, яқинлар ва қариндошлар билан узлуксиз алоқада бўлиш зарурлиги алоҳида қайд этилган.

Ўзбекистон Республикасининг Исроилдаги Элчихонаси билан боғланиш учун қуйидаги телефон рақамлари кўрсатилган: 03-672-2466, 03-672-2371, 03-758-5075, 03-758-5076, фавқулодда ҳолатлар учун эса +972 54 485 1397. Элчихонанинг электрон почта манзили: il.uzembassy@mfa.uz.

Ташқи ишлар вазирлиги фуқароларни вазиятга масъулият билан ёндашишга ва хавфсизлик қоидаларига қатъий амал қилишга чақирди.