Тошкент, Ўзбекистон (UzDaily.uz) — Ўзбекистон ташқи ишлар вазири Бахтиёр Саидов Саудия Арабистони Подшоҳлиги ташқи ишлар вазири шаҳзода Файсал бин Фарҳон Ол Сауд билан музокаралар ўтказди.

Бахтиёр Саидовнинг таъкидлашича, икки давлат ўртасидаги ҳамкорлик жадал суръатларда ривожланиб бормоқда. Ўзаро инвестициявий лойиҳалар портфели тобора кенгайиб, туризм ва иқтисодий алоқалар мустаҳкамланмоқда, икки томонлама шериклик эса янги босқичга чиқмоқда.

Вазир томонлар ўртасидаги мулоқотни янада чуқурлаштириш зарурлигини таъкидлаб, Форс кўрфази араб давлатлари ҳамкорлик кенгаши ва Марказий Осиё мамлакатлари ўртасидаги алоқаларни мустаҳкамлаш, шунингдек, долзарб халқаро масалалар юзасидан фикр алмашиш муҳим эканини қайд этди.