Тошкент, Ўзбекистон (UzDaily.uz) — Ўзбекистон Савдо-саноат палатаси раиси ўринбосари Дилшод Расулов ва "Better Cotton" ташкилотининг аъзолик ва таъминот занжири бош директори Ева Клейтон ўртасида учрашув бўлиб ўтди.

Музокаралар давомида Ўзбекистон Савдо-саноат палатасининг ҳозирги фаолияти ва келгусида амалга оширилиши режалаштирилган ишлар ҳақида маълумот берилди. Шунингдек, икки ташкилот ўртасида қўшма лойиҳаларни амалга ошириш юзасидан фикр алмашилди.

“Better Cotton” — пахта етиштиришнинг барқарор усулларини тарғиб қилувчи халқаро нотижорат ташкилот. У экологик тоза етиштириш стандартларини ишлаб чиқади, фермерларни самарали усулларга ўргатади ва пахта саноатида меҳнат шартларини яхшилашга кўмаклашади.

Суҳбат чоғида, Ева Клейтон Ўзбекистонда 2022 йилдан буён фаолият олиб бораётганликларини ва ҳозирги кунга қадар 9 та пахта кластерига “Better Cotton” сертификатини олишда амалий ёрдам берилганини таъкидлади.

Дилшод Расулов эса Ўзбекистонда пахта етиштирувчилар ва пахта кластерлари учун Ҳукумат томонидан берилган имтиёзлар ва қулайликлар ҳақида маълумот берди.

Музокаралар натижасида, томонлар келгусида Ўзбекистоннинг пахта етиштирувчилари ва пахта кластерларига ташқи бозорга чиқишда кўмаклашиш мақсадида, “Better Cotton” халқаро сертификатини олишлари учун биргаликда иш олиб боришга келишиб олдилар.