Ўзбекистон Соғлиқни сақлаш вазирлиги: «Док-1 Макс» препаратини олган болаларга компенсация тўловлари вазирлик ваколатига кирмайди

Тошкент, Ўзбекистон (UzDaily.uz) — «Док-1 Макс» препаратини олгандан сўнг ногирон бўлиб қолган болаларга компенсация тўлаш масалалари Ўзбекистон Соғлиқни сақлаш вазирлиги ваколатига кирмайди. Бу ҳақда соғлиқни сақлаш вазири Асилбек Худаяров маълум қилди.

Унинг сўзларига кўра, препарат қўлланилиши натижасида жабр кўрган барча беморларга белгиланган тартибда тиббий ёрдам кўрсатилмоқда — яшаш жойидаги оилавий шифокорлар орқали, бошқа фуқаролар билан тенг равишда.

Амбулатор даволаниш зарур бўлган ҳолларда болалар поликлиникаларда тиббий ёрдам олади, стационар даволаниш талаб этилганда эса давлат тиббиёт муассасаларида бепул даволаниш таъминланади.

Шу билан бирга, вазир компенсация тўловлари масаласи идора ваколатларидан ташқари эканини таъкидлади.

Унинг қайд этишича, мазкур иш бўйича бир нечта суд жараёнлари бўлиб ўтган ва тегишли қарорлар қабул қилинган. Вазирликнинг асосий вазифаси эса оғир заҳарланиш оқибатларини бошдан кечирган беморларни тиббий жиҳатдан қўллаб-қувватлаш ва уларнинг соғлиғини назорат қилишдан иборат.