Ўзбекистон Республикаси Рақобатни ривожлантириш қўмитаси Рамазон ойи арафасида истеъмолчилар ҳуқуқларига риоя этиш бўйича кафе ва ресторанларни огоҳлантирди

Тошкент, Ўзбекистон (UzDaily.uz) — Ўзбекистон Республикаси Рақобатни ривожлантириш қўмитаси муқаддас Рамазон ойи арафасида жамоат овқатланиш корхоналарига истеъмолчилар ҳуқуқларини чеклашга йўл қўймаслик тўғрисида огоҳлантириш билан мурожаат қилди.

Қўмита маълум қилишича, айрим кафе, ресторан ва ошхоналар “рамазон акциялари” доирасида мажбурий комплекс таомлар тўпламларини жорий этиб, минимал нархларни белгиламоқда ва мижозларга муқобил танлов имкониятини тақдим этмаяпти.

Қўмита фикрича, бундай амалиёт истеъмолчиларнинг эркин танлов ҳуқуқини чеклаши мумкин.

Қўмита хабарида таъкидланишича, “Истеъмолчилар ҳуқуқларини ҳимоя қилиш тўғрисида”ги қонуннинг 4-моддасига мувофиқ, истеъмолчи товар (иш, хизмат)ни эркин танлаш ва унинг тегишли даражада сифатли бўлишини талаб қилиш ҳуқуқларига эга.

Қонуннинг 21-моддасига кўра, сотувчи ёки ижрочи истеъмолчини қўшимча товар ёки хизматларни харид қилишга мажбурлашга ҳақли эмас.

Жамоат овқатланиш корхоналари хизмат кўрсатиш жараёнида қўшимча хизмат ёки маҳсулотларни мажбурий тарзда таклиф қилмаслиги, шунингдек, мижозларнинг комплекс тўпламдан воз кечиб, меню бўйича таом буюртма қилиш ҳуқуқини чекламаслиги шарт.

Шу билан бирга, таомлар таркибида аллергенлар ёки ферментлар мавжудлиги каби омиллар мижозлар саломатлигига салбий таъсир кўрсатиши мумкинлиги ҳам инобатга олиниши лозим.

Қўмита, шунингдек, Ўзбекистон Республикаси Конституциясининг 65-моддаси истеъмолчилар ҳуқуқларининг устуворлигини таъминлаган ҳолда иқтисодий фаолият, тадбиркорлик ва меҳнат эркинлигини кафолатлашини эслатиб ўтди.

Истеъмолчилар ҳуқуқларини бузиш ҳолатлари аниқланган тақдирда, жамоат овқатланиш корхоналарига нисбатан қонунда белгиланган таъсир чоралари қўлланилиши маълум қилинди.