Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев қатор халқаро шартномаларни тасдиқловчи қарорни имзолади.

Қарорга мувофиқ, Ўзбекистон ва Монголия ҳукуматлари ўртасида имзоланган Халқаро автомобиль ташувлари тўғрисидаги битим ҳамда Ҳаво қатнови тўғрисидаги битим ратификация қилинди.

Мазкур битимлар 2024 йил 24 июнь куни Тошкентда, Монголия Президентининг Ўзбекистонга биринчи давлат ташрифи доирасида имзоланган эди.

Эслатиб ўтамиз, 2024 йил 23–26 июнь кунлари Монголия Президенти Ухнаагийн Хурэлсух расмий ташриф билан Ўзбекистонда бўлган.

Қарорга кўра, Ўзбекистон Республикаси Транспорт вазирлиги ушбу битимларда белгиланган қоидаларни амалга ошириш учун масъул этиб тайинланди. Вазирлар Маҳкамаси ҳамда тегишли вазирлик ва идоралар раҳбарларига битимлар кучга киргандан сўнг уларнинг ижросини таъминлаш юзасидан зарур назоратни ташкил этиш вазифаси юклатилди.