Ўзбекистон Президенти Администратсияси раҳбари Брюсселда Европа Иттифоқи раҳбарияти билан учрашувлар ўтказди

Тошкент, Ўзбекистон (UzDaily.uz) — 9 октябрь куни Ўзбекистон Президенти Администрацияси раҳбари Саида Мирзиёева Брюссель шаҳрида бўлиб ўтган Global Gateway форуми доирасида Европа Иттифоқининг қатор юқори даражадаги вакиллари билан учрашувлар ўтказди.

У Европа комиссияси президенти Урсула фон дер Ляйен билан мулоқот қилди. Саида Мирзиёева ўзининг Telegram-каналида бу учрашувдан мамнун эканини ва Ўзбекистон ҳамда Европа Иттифоқи ўртасидаги ҳамкорликни янада мустаҳкамлашга ишончини билдирди.

Шунингдек, у Европа Иттифоқининг ташқи сиёсат ва хавфсизлик бўйича Олий вакили, Еврокомиссия вице-президенти Кая Каллас билан музокаралар ўтказди.

Суҳбат чоғида томонлар глобал ва минтақавий масалаларни муҳокама қилиб, айниқса Марказий Осиёдаги жараёнларга алоҳида эътибор қаратдилар.

Муҳокама давомида геосиёсий вазиятнинг мураккаблигига қарамасдан, минтақа ва Европа Иттифоқи ўртасидаги ҳамкорлик изчил ривожланиб бораётгани таъкидланди.

Саида Мирзиёева Кайя Калласга очиқ ва мазмунли мулоқот учун миннатдорлик билдирди ҳамда Ўзбекистон ва Европа Иттифоқи ўртасида ўзаро манфаатли шерикликни янада чуқурлаштириш йўлидаги кейинги қадамларни интиқлик билан кутаётганини таъкидлади.