Тошкент, Ўзбекистон (UzDaily.uz) — 11 июнь куни Ўзбекистон ўсмирлар терма жамоаси (U-17) Чилида ўтказилган ўртоқлик учрашувида маҳаллий ўсмирлар термаси устидан 1:0 ҳисобида ғалаба қозонди. Бу икки жамоа ўртасида режалаштирилган икки ўйиндан биринчиси эди.

Учрашувдаги ягона голни 35-дақиқада Азизбек Эримбетов киритди.

Бу ўйинлар 2025 йил ноябр ойида Қатарда бўлиб ўтадиган 17 ёшгача бўлган футболчилар ўртасидаги Жаҳон чемпионатига тайёргарлик доирасида ўтказилмоқда.

Чилига қарши навбатдаги ўйин 13 июнь куни бўлиб ўтади. Шундан сўнг, 17 ва 19 июнь кунлари Ўзбекистон ўсмирлар терма жамоаси Боливия ўсмирлар жамоасига қарши майдонга тушади.