Тошкент, Ўзбекистон (UzDaily.uz) — Инвестициялар, саноат ва савдо вазирлигида вазир Лазиз Кудратов ва “Meraque Group” компанияси раҳбари Разали Исмоил ўртасида учрашув бўлиб ўтди.

2017 йилда Малайзияда ташкил этилган Meraque Group қишлоқ хўжалиги, хавфсизлик ва логистика соҳаларида илғор технологияларни ишлаб чиқаради.

Томонлар жорий йилнинг 4-5 февраль кунлари Малайзияга олий даражадаги ташриф чоғида эришилган келишувларни, жумладан, қишлоқ хўжалигида дронлардан фойдаланиш лойиҳасининг амалга оширилишини кўриб чиқдилар.

Лойиҳанинг биринчи босқичи доирасида компания вакиллари томонидан Тошкент вилоятининг Янгийўл ва Чиноз туманларида «шоу-рум» ташкил этилади. «Шоу-рум»ларда Ўзбекистоннинг манфаатдор компанияларга махсус дронлардан фойдаланиш имконияти берилади.

Компаниянинг Малайзиядаги ишлаб чиқариш корхоналарида ўқув дастурини амалга ошириш бўйича келишувларга эришилди.