Тошкент, Ўзбекистон (UzDaily.uz) — Ўзбекистон Марказий Осиёдаги энг кўп меҳнат муҳожирларига эга мамлакат ҳисобланади. Уларнинг аксарияти Россия ва Қозоғистонда меҳнат қилмоқда. Жаҳон Банки Ўзбекистон ҳукуматининг меҳнат муҳожирларининг касбий ва тил кўникмаларини ривожлантириш ҳамда уларнинг ҳуқуқ ва манфаатларини ҳимоя қилиш йўлидаги саъй-ҳаракатларини қўллаб-қувватлайди.

Ушбу ҳамкорлик доирасида Ўзбекистон делегацияси дунёда меҳнат муҳожирлари сони бўйича етакчи ўнталикдан ўрин олган Филиппинга танишув сафарини уюштирди. Делегация таркибидан Вазирлар Маҳкамаси ҳузуридаги Миграция агентлиги ҳамда Ижтимоий ҳимоя миллий агентлиги вакиллари жой олди.

Ташриф давомида Филиппин ҳукуматининг меҳнат миграцияси соҳасидаги давлат сиёсати ва дастурлари ўрганилди. Ўзбекистон делегацияси Филиппин муҳожирлар меҳнати масалалари департаменти, Миллий иқтисодий ва ижтимоий ривожланиш агентлиги, Муҳожирлар меҳнатини муҳофаза қилиш бошқармаси, Техник таълим ва малака ошириш агентлиги вакиллари билан самарали учрашувлар ўтказди.

Учрашувлар давомида ушбу ташкилотлар фаолияти ва хизматлари, борадиган мамлакатларда филиппинлик меҳнат муҳожирларнинг ҳуқуқларини ҳимоя қилиш механизмлари, уларнинг касбий маҳоратини ошириш, қайтган муҳожирларни реинтеграция қилиш, миграция маълумотларини бошқариш ва бошқа масалалар муҳокама қилинди.

Жаҳон банкининг ўрганиш ташрифи натижалари Ўзбекистон ҳукуматига меҳнат миграцияси соҳасида келгусидаги техник ёрдам йўналишларини аниқлаш ҳамда Филиппиннинг тегишли давлат органлари билан ҳамкорликни кенгайтириш бўйича чора-тадбирларни ишлаб чиқишда муҳим асос бўлиб хизмат қилади.