Тошкент, Ўзбекистон (UzDaily.uz) — Адлия вазирлиги банклар учун киберхавфсизлик бўйича минимал талабларга оид низомни рўйхатдан ўтказди, дея хабар бермоқда вазирликнинг расмий ҳуқуқий ахборот канали.

Марказий банк томонидан тайёрланган ҳужжат кредит ташкилотлари ахборот тизимларини ҳимоя қилишнинг асосий стандартларини белгилайди. Хусусан, банклар ахборот активларини сақлаш ва тўлов маълумотларини ноқонуний ўзгартириш ҳолатларини, шунингдек банк ва унинг мижозларига етказилиши мумкин бўлган зарарни олдини олиш учун махсус ахборот ва киберхавфсизлик хизматларини ташкил этиши шарт.

Кредит ташкилотлари ахборот хавфсизлиги бўйича ички сиёсатларни ишлаб чиқиши ва маълумотлар базасини созлашда хатоликлар хавфини камайтириш чораларини жорий этиши лозим. Айниқса, маълумотлар базаларига ноқонуний кириш, администратор ва фойдаланувчи паролларини ошкор этиш, тизим файлларига аралашиш, зарарли дастур ўрнатиш ва сервер ҳамда маълумотлар базаларига масофавий ҳужумларни амалга ошириш каби жиноятчилар ҳаракатларини олдини олишга алоҳида эътибор қаратилади.

Киберхавфсизлик хизматлари тармоқ экранлари ва прокси-серверлар электрон протоколларини назорат қилиши шарт. Агар ташқи ҳужум аломатлари аниқланса, улар дарҳол Марказий банкка хабар бериши керак.

Жорий йил апрель ойида Президент Шавкат Мирзиёев рақамли жиноятчиликка қарши курашни кучайтириш чораларини маъқуллаб, банклар, тўлов тизимлари ва сервислар кундалик операцияларида мижозлар молиявий хавфсизлигини устувор вазифа сифатида белгилади.

Ахборот ва киберхавфсизлик қоидаларига риоя этилмаган тақдирда, ташкилот мижозларга етказилган зарарни ўз ҳисобидан қоплаши шарт бўлади.

Бундан ташқари, Президент Марказий банкнинг кибержиноятчиликка қарши курашиш ваколатларини кенгайтирди ва 1 сентябрга қадар банк тизимида антифрод тизимларини жорий этишни топширди.