Ўзбекистон инвестиция вазири BlackRock билан инвестиция ҳамкорлигини кенгайтириш масалаларини муҳокама қилди

Тошкент, Ўзбекистон (UzDaily.uz) — 26 январь куни Ўзбекистон Республикаси Инвестициялар, саноат ва савдо вазири Лазиз Кудратов BlackRock гуруҳига кирувчи GIP компаниясининг ҳамкори, капитал жалб этиш йўналиши бўйича глобал раҳбари ҳамда ижроия қўмитаси аъзоси Эрик Варвел билан учрашди.

Музокаралар давомида инвестициявий ҳамкорликни ривожлантириш ва етакчи халқаро молия-инвестиция тузилмалари билан ўзаро ҳамкорликни кенгайтириш масалалари юзасидан фикр алмашилди.

Томонлар Ўзбекистон иқтисодиётига узоқ муддатли капитал жалб этишнинг устувор йўналишларини, жумладан саноат, энергетика, инфратузилма ва барқарор ривожланиш соҳаларидаги йирик лойиҳаларни амалга ошириш масалаларини муҳокама қилдилар. Ишлаб чиқариш қувватларини модернизация қилиш, замонавий технологияларни жорий этиш ҳамда мамлакатнинг инвестициявий жозибадорлигини оширишга қаратилган ташаббусларни қўллаб-қувватлашга қизиқиш билдирилди.

Шунингдек, глобал институционал инвесторлар билан ҳамкорликни кенгайтириш, лойиҳавий молиялаштириш механизмларини ривожлантириш ҳамда қулай ва ишончли инвестиция муҳитини шакллантириш масалаларига алоҳида эътибор қаратилди.

Учрашув якунида томонлар конструктив мулоқотни давом эттириш ва истиқболли ҳамкорлик йўналишлари бўйича амалий ҳамкорликни чуқурлаштиришдан манфаатдор эканликларини тасдиқладилар.