Ўзбекистон Integra Capital билан энергетика инвестицияларини муҳокама қилди

Тошкент, Ўзбекистон (UzDaily.uz) — Ўзбекистон Республикаси инвестициялар, саноат ва савдо вазири ўринбосари Акрам Алиев “Integra Capital” компаниясининг бизнесни ривожлантириш бўйича бошқарувчи директори Гонсало Родригес билан учрашув ўтказди.

“Integra Capital” - 1995 йилда ташкил этилган ҳамда Америка, Европа ва Осиё қитъаларида фаолият юритувчи халқаро инвестиция компаниясидир. Компания томонидан амалга оширилган битимларнинг умумий қиймати 21 миллиард доллардан ошади.

Мазкур тузилма энергетика, ресурслар, технологиялар ва кўчмас мулк соҳаларига сармоя киритиб, асосан ривожланаётган мамлакатлардаги истиқболли лойиҳаларга эътибор қаратади.

Мулоқот чоғида энергетика ва геология соҳаларидаги ҳамкорлик, қўшма лойиҳаларни ҳаётга татбиқ этиш ҳамда инвестицияларни жалб қилиш масалалари муҳокама қилинди. Томонлар алоқаларни кенгайтириш ва илмий-техник ҳамкорликни ривожлантиришга ўзаро тайёрлигини билдирдилар.

Ўзбекистон томони компания ташаббусларини қўллаб-қувватлаб, уларни амалга оширишда кўмаклашишга тайёрлигини маълум қилди.