Тошкент, Ўзбекистон (UzDaily.uz) — 11 февраль куни Жакартада Ўзбекистон Республикаси ташқи ишлар вазири Бахтиёр Саидов Индонезия ташқи ишлар вазири Сугионо билан учрашув ўтказди.

«Ўзбекистон делегацияси номидан Индонезия Ташқи ишлар вазирлигига илиқ қабул учун миннатдорчилик билдирамиз. Бугунги кун тартибимиз кенг қамровли бўлди. У барча ҳамкорлик йўналишларини қамраб олди ва янги имкониятлар белгилаб берди. Асосий мақсад — алоқаларни янги босқичга кўтариш, дўстликни мустаҳкамлаш ва халқларимизни бир-бирига янада яқинлаштириш. Бизда мустаҳкам асос ва катта салоҳият мавжуд», — деб ёзди Бахтиёр Саидов ўзининг Telegram-каналида.

Учрашув якунларида томонлар дипломатик паспорт эгалари учун визасиз режим ҳақидаги Битимни имзолашди.