Тошкент, Ўзбекистон (UzDaily.uz) — 18 февраль куни видеоконференцалоқа шаклида Ўзбекистон ва Грузия Савдо-саноат палаталари ҳамраислигида Ўзбекистон-Грузия ишбилармонлар кенгашининг йиғилиши ўтказилди.

Ўзбекистон-Грузия ишбилармонлар кенгаши 2023 йил 18 июль куни Грузиянинг Тбилиси шаҳрида ташкил этилган бўлиб, унинг асосий мақсади икки мамлакат ўртасидаги савдо-иқтисодий ҳамкорликни ривожлантириш, тадбиркорлик субъектларини қўллаб-қувватлаш ва қўшма инвестиция лойиҳаларини амалга оширишга кўмаклашишдан иборат.

Йиғилишда томонлар Ишбилармонлар кенгашининг 2025 йилдаги фаолияти, Ўзбекистон ва Грузия бизнес вакиллари учун қулай шарт-шароитлар яратиш, бизнес-миссияларни амалга ошириш ва янги ҳамкорлик йўналишларини ривожлантириш бўйича бир қатор таклифларни муҳокама қилдилар ҳамда муҳим келишувларга эришилди.

Музокаралар натижаларига кўра, 2025 йил май ойида Грузия Савдо-саноат палатаси бошчилигида Грузия ишбилармон доиралари делегациясининг Ўзбекистонга ташрифи режалаштирилди. Ташриф доирасида ишбилармонлар кенгашининг навбатдаги йиғилиши, қўшма бизнес-форум, В2В учрашувлар ўтказишга келишиб олинди.

2025 йил июнь ойида эса Ўзбекистон Савдо-саноат палатаси ташаббуси билан ўзбек тадбиркорларининг Грузияга ташрифи амалга оширилиб, Тбилиси шаҳрида “Made in Uzbekistan” кўргазмаси ўтказилиши режалаштирилди.

Шунингдек, “Tbilisi Dry Port” ҳудудида Ўзбекистон ишлаб чиқарувчиларининг маҳсулотлари (электротехника, қурилиш материаллари, қишлоқ хўжалиги маҳсулотлари, мебель) учун шоурум ва омборхона ташкил этиш масаласи кўриб чиқилди.