Тошкент, Ўзбекистон (UzDaily.uz) — Россия ва Туркиядаги Ўзбекистон элчихоналари Янги Тошкент шаҳри қурилишида ишлаш учун мутахассисларни жалб қилиш бўйича эълон берди. Дипломатик ваколатхоналарнинг Telegram-каналларида мазкур лойиҳага қўшилишга таклиф этувчи видео чоп этилди.

Маълум қилинишича, фуқароларга 20 минг гектар майдонга барпо этиладиган шаҳар қурилишида иштирок этиш имконияти таклиф этилмоқда.

Лойиҳа доирасида хорижда бўлган ўзбекистонликлар учун 10 мингта иш ўрни яратилиши режалаштирилган.

Қурилиш соҳасида 38 йўналиш бўйича мутахассислар қабул қилинади. Жумладан, бетончи, ёғоч уста, газ ва электр сваркачилари, сантехник, электрик, ҳашаматчи, гишт терувчи ва бошқа мутахассислар талаб этилмоқда. Ойлик иш ҳақи бажариладиган ишлар характери ва ҳажмига қараб белгиланади ва ўртача 8—15 миллион сўмни ташкил қилади. Ҳодимлар уй-жой, махсус кийим, транспорт ва уч маҳал овқат билан таъминланади. Шунингдек, расмий ишга жойлашган ишчилар кунлик 8 соатлик иш режими ва қўшимча дам олиш кунларига эга бўлади.

Қурилиш бригадалари ҳам иш ҳажмига қараб буюртмалар олиш ва уларни келишув асосида бажариш имкониятига эга бўлади.

Ишга жойлашиш ва қўшимча маълумот олиш учун Бандлик ва камбағалликни қисқартириш вазирлигининг колл-марказига мурожаат қилиш мумкин. Хорижда бўлган фуқаролар учун махсус “доимий алоқа линияс”и (hotline) 0 800 000 11 76 рақамида ишлайди. Ўзбекистондаги фуқаролар эса 1176 рақамига мурожаат қилиши мумкин.

Эслатиб ўтамиз, 2023 йил март ойида Президент Янги Тошкент қурилишини бошлаб, рамзий капсула қўйган эди.

Кутилганидек, Янги Тошкент тахминан 1 миллион аҳолини ўз ичига олиши мумкин. Бу ерда давлат идоралари, университетлар ва бошқа муҳим объектлар жойлашади.

Лойиҳанинг биринчи босқичида 11 та кўп тармоқли турар-жой мажмуалари, шунингдек, меҳмонхоналар ва ресторанлар қурилиши олиб борилмоқда. Бу қурилишларнинг умумий қиймати 490 миллион долларга баҳоланган.