Тошкент, Ўзбекистон (UzDaily.uz) — Ўзбекистоннинг Андоррага янги тайинланган элчиси (қароргоҳи Мадрид шаҳрида жойлашган) Фаррух Турсунов Андорра князи-ҳамраиси, Урхельск епископи Жоан Энрик Вивес-и-Сисилга ишонч ёрлиқларини топширди, деб хабар бермоқда "Дунё" АА мухбири.

Тантанали маросимдан сўнг бўлиб ўтган суҳбат чоғида Урхельск епископи элчини самимий қутлаб, Ўзбекистонда кечаётган ўзгаришлар жараёнларини катта қизиқиш билан кузатиб боришини таъкидлади. У, шунингдек, мамлакатимиз раҳбариятининг, айниқса, бугунги мураккаб геосиёсий шароитда тинчлик, барқарорлик ва халқаро мулоқотни таъминлашга қаратилган оқилона ва узоқни кўзлаган сиёсатини юксак баҳолади.

Андорра ҳамраиси Ўзбекистон миллатлараро ва конфессиялараро тотувликнинг муваффақиятли намуналарини кўрсатаётгани, 130 дан ортиқ миллат ва элатлар, шунингдек, 2000 дан ортиқ диний ташкилотлар тинч ва ўзаро ҳурмат муҳитида истиқомат қилаётганини эътироф этди. Шунингдек, у давлат сиёсатининг ижтимоий йўналиши ва Ўзбекистоннинг халқаро кун тартибидаги фаол иштирокини таъкидлади. "Мамлакатингизда деярли ҳар ойда бутун дунёдан вакиллик делегациялари иштирок этадиган йирик халқаро тадбирлар ўтказилмоқда", деди Урхельск епископи Энрик Вивес-и-Сисилга.

Андорра кичик бўлишига қарамай, Ўзбекистон билан муносабатларни ривожлантиришга катта аҳамият бераётгани, уни муҳим ва ҳурматли ҳамкор сифатида қабул қилиши алоҳида қайд этилди.

Епископ Ўзбекистоннинг иқтисодий динамикасини, жумладан, COVID-19 пандемияси даврида мамлакат барқарор ўсиш суръатларини кўрсатиб, инқироздан ижобий кўрсаткичлар билан чиққанини диққат билан кузатиб боргани самарали ислоҳотлар самараси эканини билдирди.

Ўзбекистоннинг сайёҳлик салоҳияти, хусусан Самарқанд шаҳрининг буюк тарихи ва маданий меросига эътибор қаратилди.

Бундан ташқари, Андорра ҳамраиси Ўзбекистонга ташриф буюриш истагини билдирди ва андорралик ёшларнинг бой тарих ва маданиятга эга мамлакатларга қизиқиши ортиб бораётгани, Ўзбекистон эса бундай йўналишлар орасида алоҳида ўрин тутаётганини таъкидлади.

Учрашув якунида томонлар Ўзбекистон ва Андорра ўртасида турли соҳалар, жумладан, маданият, туризм ва халқаро мулоқот каби икки томонлама ҳамкорликни янада мустаҳкамлашдан ўзаро манфаатдор эканликларини тасдиқладилар.

Ўзбекистон ва Андорра ўртасидаги дипломатик муносабатлар 2009 йил 1 декабрда ўрнатилган.

Эслатиб ўтамиз, Фаррух Турсунов Ўзбекистоннинг Испаниядаги Фавқулодда ва Мухтор Элчиси сифатида 2023 йил 7 декабрь куни Мадрид шаҳрига ташриф буюрган эди. Дипломат 2024 йилнинг апрель ойида Ўзбекистон элчиси сифатида Испания Қироли Филипп VI га ишонч ёрлиқларини топширган. 

Шунингдек, Фаррух Турсунов мамлакатимизнинг "БМТ Туризм" ташкилотидаги (аввалги Бутунжаҳон туризм ташкилоти) доимий вакили ҳисобланади.

Бундан ташқари, элчи Фаррух Турсунов шу март ойида Андорра ҳамраиси, Франция Президенти Эммануэль Макронга ишонч ёрлиқларини топширган эди.