Тошкент, Ўзбекистон (UzDaily.uz) — Ўзбекистон Республикаси Бош вазирининг ўринбосари – иқтисодиёт ва молия вазири Ж.Қўчқоров ва Бош прокурор Н.Йўлдошев раҳбарлигида яширин иқтисодётни қисқартириш бўйича Махсус комиссиянинг навбатдаги кенгайтирилган йиғилиши ўтказилди.

Унда, Махсус комиссия ва ҳудудий комиссиялар аъзолари, Олий Мажлис Қонунчилик Палатаси ва Сенати қўмита раислари ҳамда бошқа мутасадди ташкилот ва идораларнинг масъуллари иштирок этди.

Йиғилишда мамлакатимизда яширин иқтисодиётни қисқартириш, фаолиятда коррупция ҳолатларига барҳам бериш ҳамда уларга қарши кескин курашиш борасида 2024 йилда амалга оширилган ишлар ҳамда йўл қўйилган камчиликлар батафсил муҳокама қилинди.

Хусусан, ўтган 2024 йилда хуфиёна айланмаларга чек қўйиш ва фойдаланилмаётган захираларни ишга тушириш орқали бюджетга қўшимча манбаларни таъминлаш мақсадида манзилли ишлар йўлга қўйилди.

Натижада, 747 мингдан ортиқ ҳолатда расмий секторда акс этмаган айланмалар ҳисобга олиниб, бюджетга қўшимча 15,9 трлн. сўм маблағ ундирилди.

Тадбиркорлик субъектларида норасмий ишлаётган 15 мингдан ортиқ иш ўринлари легаллаштирилиб, яширин фаолият кўрсаётган 9 мингта тадбиркор расмий секторга қайтарилди.

Хуфиёна иқтисодий фаолият билан боғлиқ жиноят ишлари доирасида қарийб 2 трлн. сўм зарар ундирилди.

Масъул идораларнинг ҳамкорликдаги саъй - ҳаракатлари натижасида, ўтган йилда давлат бюджети даромадлари прогнози ижроси 274,4 трлн. сўмга ёки 101,3 фоизга бажарилди, тушумлар 2023 йилга нисбатан 18,4 фоизга ўсди.

Бироқ, таҳлиллар яширин иқтисодиётни қисқартириш аҳволи тубдан яхшиланмаётганлиги, масъуллар зиммасига юклатилган вазифалар ижроси етарли даражада бажарилмаётганлиги оқибатида қониқарли натижаларга эришилмаганлиги кўрсатиб ўтилди.

Йиғилиш давомида, солиқ ва божхона маъмурчилигини такомиллаштириш, солиқ юкини пасайтириш, бизнесни юритишдаги бюрократик тўсиқларни бартараф этиш ҳисобига уларга тенг рақобат шароитини яратиш ҳамда иқтисодиётни рақамлаштириш орқали яширин иқтисодиёт кўламини қисқартириш ва бюджетга тушумлар миқдорини ошириш тўғрисида масъул вазирлик ва идораларга топшириқлар берилди.

Шунингдек, фармацевтика, транспорт, қурилиш, геология, қишлоқ хўжалиги, туризм ва бандлик каби долзарб соҳаларда яширин айланмалар улушини камайтириш, коррупцион омилларни бартараф қилиш ҳақида топшириқлар берилиб, назоратга олинди.

Тадбир сўнгида масъул вазирлар ва идоралар раҳбарларининг тушунтириш ва ахборотлари эшитилди, йўл қўйилган камчиликлар кўрсатиб ўтилди.