Ўзбекистон бокс федерацияси ва Asian Boxing ўртасида ҳамкорлик меморандуми имзоланди

Тошкент, Ўзбекистон (UzDaily.uz) — Ўзбекистон бокс федерацияси ва Осиё бокс федерацияси Asian Boxing республикада боксни ривожлантириш ва халқаро тажрибани жорий этишга қаратилган икки томонлама ҳамкорлик меморандумини имзолади.

Ҳужжат Asian Boxing президенти Пичаи Чунхаважиранинг Тошкентда бўлиб ўтаётган Осиё Олимпия кенгашининг 46-Генерал ассамблеясида иштирок этиш мақсадида Ўзбекистонга ташрифи доирасида имзоланди.

Asian Boxing президенти Ўзбекистон бокс федерацияси президентининг биринчи ўринбосари ва Asian Boxing вице-президенти Сакен  Полатов билан учрашув ўтказди.

Музокаралар чоғида томонлар ҳамкорликнинг асосий йўналишларини муҳокама қилиб, яқин истиқбол учун устувор вазифаларни келишиб олдилар.

Меморандумга мувофиқ, мамлакатнинг ҳар бир ҳудудида замонавий бокс марказларини ташкил этиш, спортчилар ва ҳакамларни профессионал тайёрлашни ривожлантириш, шунингдек самарали машғулот услубларини жорий этиш назарда тутилган.

Шу билан бирга, хорижий мураббийлар ва мутахассисларни жалб этишга, маҳаллий кадрлар малакасини ошириш мақсадида халқаро ўқув-машғулот йиғинларини ташкил этишга алоҳида эътибор қаратилган.