Тошкент, Ўзбекистон (UzDaily.uz) —  Бирлашган Миллатлар Ташкилоти Тараққиёт Дастури (БМТТД) кўмагида Ўзбекистон Республикаси Истиқболли лойиҳалар миллий агентлиги (ILMA) мутахассислари ва ходимларидан иборат делегация ўқув сафари доирасида Швейцарияда бўлди. Ташриф давомида Халқаро суғурта назоратчилари Уюшмаси (IAIS), шунингдек, суғурталаш ва қайта суғурталаш, рискларни бошқариш бўйича жаҳоннинг етакчи компаниялари Свисс Ре ва ЭуропеРе вакиллари билан самарали учрашувлар ўтказди.

Халқаро суғурта назоратчилари Уюшмаси (IAIS) бутун дунёдан 200 дан ортиқ аъзоларни бирлаштириб, глобал суғурта мукофотларининг 97 фоизидан ортиғини ташкил этади. Ўзбекистоннинг мазкур ташкилотга аъзо бўлиши миллий суғурта бозорини ривожлантириш, унинг шаффофлиги ва рақобатбардошлигини оширишда стратегик муҳим қадам бўлади. Шунингдек, у тартибга солиш ва назоратни яхшилаш, рақамли технологияларни (ИнсурТеч) ривожлантириш, таҳлилий маълумотлардан фойдаланиш ва ўзаро билим алмашиш ҳамда мамлакатнинг халқаро иштирокини мустаҳкамлаш учун имкониятлар яратади.

Музокаралар давомида қуйидаги асосий масалалар муҳокама қилинди:

ИАИСнинг 2025–2029 йилларга стратегик режаси ва 2025–2026 йиллар учун йўл харитаси;

Ўзбекистоннинг IAISга аъзо бўлиш истиқболлари ва унинг миллий суғурта бозорига таъсири;

Халқаро суғурта стандартлари контекстида ILMAнинг ривожланиши;

ИАИСнинг тузилиши ва фаолияти, шунингдек, аъзоликнинг мамлакат суғурта бозори учун афзалликлари;

Иқлим ўзгариши хавфини бошқариш бўйича халқаро тажриба ва уларни молиялаштириш механизмлари;

Свисс Ре ва Эуропе Ре компаниялари билан қишлоқ хўжалиги суғуртаси, рискларни бошқариш ва Ўзбекистонда қайта суғурта бозорини ривожлантириш соҳасида ҳамкорлик қилиш имкониятлари.

Халқаро ўқув сафари Германия ҳукумати томонидан молиялаштирилган БМТ Тараққиёт Дастурининг “Ўзбекистонда суғурта ва рискларни молиялаштириш механизмини такомиллаштириш” глобал лойиҳаси доирасида ташкил этилди. Лойиҳанинг асосий мақсади Ўзбекистон суғурта бозорини ривожлантиришга кўмаклашиш, суғурта сиёсатини мамлакат иқтисодиётини ривожлантириш дастурига интеграциялаш, инклюзив суғуртани кенгайтириш, суверен рисклар ва табиий офатлар хавфини молиялаштириш, суғурта соҳасига инвестицияларни жалб этишдан иборат.

Бу ҳамкорлик Ўзбекистон учун суғурта соҳасида илғор ечимларни татбиқ этиш ва мамлакатнинг ташқи хавф-хатарларга нисбатан иқтисодий барқарорлигини ошириш учун янги имкониятлар очади.