Тошкент, Ўзбекистон (UzDaily.uz) — Ўзбекистон ва Афғонистон ўртасида электр энергияси етказиб бериш бўйича келишув имзоланди, деб хабар берди Da Afghanistan Breshna Sherkat (DABS) компанияси.

Ҳужжат «Ҳудудий электр тармоқлари» компанияси ва DABS ўртасида Афғонистон ташқи ишлар ва молия вазирликлари ҳамда «Ҳудудий электр тармоқлари» ходимлари иштирокидаги учрашув якунлари бўйича имзоланди. Учрашувда DABSнинг бош директори доктор Абдул Бари Омар раҳбарлик қилган делегация қатнашди.

Келишувнинг асосий мақсади — икки мамлакат ўртасидаги энергетика соҳасидаги ҳамкорликни мустаҳкамлаш ва Афғонистонга барқарор электр энергияси етказиб беришни таъминлашдир. Бироқ, келишувнинг ҳажми, муддати ва нархига оид тафсилотлар ошкор қилинмади.

Шунингдек, учрашувда Ўзбекистон ва Афғонистонни боғлайдиган 500 кВ кучланишдаги электр узатиш линиясини (ЭУЛ) қуриш бўйича тафсилотлар муҳокама қилинди. ЭУЛ Сурхон (Ўзбекистон)дан Пули-Хумри орқали Қобулгача ўтказилади.

Лойиҳанинг қиймати 2022 йил июлида Афғонистонда 100,1 миллион долларга баҳоланган бўлиб, унинг доирасида Афғонистон кунига 24 миллион кВт·соат, яъни йилига 6 миллиард кВт·соат электр энергияси билан таъминланади. Линиянинг узунлиги 245,6 км бўлиб, шундан 45 км Ўзбекистон ҳудуди, 200,6 км эса Афғонистон ҳудуди орқали ўтади.

Техник таҳлиллар тўлиқ якунланганидан сўнг, лойиҳанинг амалга оширилиши бошланади. Лойиҳа муддатлари бир неча бор кечиктирилган эди.