Тошкент, Ўзбекистон (UzDaily.uz) — 2025 йил 1 апрелдан бошлаб Ўзбекистонда 2017 йилдан бери амал қилиб келаётган тиббий буюмлар ва рецептсиз дори воситалари учун нарх чекловлари бекор қилинади.

Бу қарор 28 январь куни Президент фармони билан тасдиқланди.

2017 йилда чекловлар жорий этилганидан бери улгуржи савдо учун энг юқори устама 15% этиб белгиланган, чакана савдо учун эса харид нархидан 20%дан ошмаслиги шарт эди.

2020 йилда дори воситалари нархларини рўйхатга олиш учун референт нарх белгилаш тизими жорий этилган. Бу тизимнинг моҳияти ишлаб чиқарувчининг ватани ва бошқа давлатлардаги нархларини солиштиришга асосланган бўлиб, шу орқали давлат регулятори бозордаги энг юқори нархларни белгилаш ва уларнинг оширилишига йўл қўймаслик имкониятига эга бўлди.

Ушбу чекловлар фақат рецепт бўйича бериладиган дори воситалари учун амалда қолади. Бундай дори воситаларининг улгуржи ва чакана савдоси учун устама мос равишда 15% ва 20%дан ошмаслиги лозим. Ушбу дори воситалари учун белгиланган энг юқори референт нархлардан юқори сотиш тақиқланади.

Янги қоидаларга мувофиқ, бир хил препаратни турли савдо номлари остида ишлаб чиқарадиган компаниялар улар учун ягона минимал референт нарх белгилаши шарт. Бу ҳолат ишлаб чиқарувчи фаол моддани ўзгартирмаган тақдирда амал қилади. Бу эса баъзи брендлар нархини сунъий равишда ошириш ва бошқаларини пасайтиришнинг олдини олади.

Шунингдек, Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази хорижий валюта курси ўзгарганда референт нархларни автоматик равишда қайта кўриб чиқади.

Агар валюта курси 3%га ошса, нархлар йилига икки марта — январь ва июль ойларида қайта кўриб чиқилади. Агар валюта курси 5% ёки ундан кўпроқ ошса, нархлар муддатидан олдин қайта кўриб чиқилади.