Тошкент, Ўзбекистон (UzDaily.uz) — Ота-она қарамоғисиз қолган яна бир вояга етмаган қизча Россия Федерациясидан Ўзбекистонга қайтарилди. Бу ҳақда Болалар ҳуқуқлари бўйича вакил матбуот хизмати хабар берди.

Болалар омбудсманига Сурхондарё вилояти Сариосиё туманида истиқомат қилувчи фуқаро Н.Г (аёл) нинг мурожаати келиб тушди.

Мурожаатда вояга етмаган невараси Д.Р (2023 йилда туғилган) нинг отаси вақтинча ҳибсхонада, онаси эса миграция марказида сақланаётганлиги сабабли 2 ёшли фарзанди Россия Федерациясида ота-она қарамоғисиз қолганлиги, ҳозирда Нижний Новгород шаҳар болалар шифохонасида эканлигини билдириб, неварасини Ўзбекистонга қайтарилишида амалий кўмак сўраган.

Болалар омбудсмани, Ички Ишлар вазирлиги, Ўзбекистоннинг Россия Федерациясидаги Бош консуллиги вакиллари ҳамкорлигида боланинг Ўзбекистонга қайтариш чоралари кўрилиб, ҳужжатлар расмийлаштирилди.

Шунингдек, Бош консуллик саъи-ҳаракатлари билан боланинг онаси ҳам Ўзбекистонга фарзанди билан қайтиши учун чоралар кўрилди.

Натижада, 2025 йил 16 май куни қизча онаси ҳамроҳлигида Ўзбекистонга олиб келинди ва буви билан яшаш манзилига етказилди.