Тошкент, Ўзбекистон (UzDaily.uz) — Жорий йилнинг 16 февраль куни Саудия Арабистонида бўлиб ўтаётган “Ривожланаётган мамлакатлар мулоқоти” конференцияси доирасида Осиё инфратузилмавий инвестициялар банки (ОИИБ) президенти Цзин Лицюн ҳамда Ўзбекистон Республикаси Бош вазири ўринбосари – Иқтисодиёт ва молия вазири Жамшид Қўчқоров ўртасида учрашув бўлиб ўтди.

Осиё инфратузилмавий инвестициялар банки — халқаро молиявий институт бўлиб, инфратузилма ва бошқа маҳсулдор секторларни ривожлантириш орқали Осиё минтақасида иқтисодий ўсишни рағбатлантириш мақсадида ташкил этилган. Банк 2016 йил 16 январда расмий фаолиятини бошлаган ва бош офиси Пекин (Хитой) шаҳрида жойлашган.

Мулоқот давомида томонлар ўзаро ҳамкорлик йўналишлари, яшил иқтисодиётни ривожлантириш, бюджетни қўллаб-қувватлаш ҳамда инфратузилмани ривожлантириш масалалари юзасидан муҳокамалар олиб борди.

Хусусан:

• Яшил ўсишни таъминлаш – яшил иқтисодиётни ривожлантириш, иқлим ўзгаришига қарши курашиш ҳамда энергия самарадорликни оширишда ҳамкорлик олиб бориш;
• Давлат-хусусий шериклик лойиҳаларини ривожлантириш – ДХШ дастурлари асосида замонавий инфратузилма лойиҳаларини амалга ошириш;
• Барқарор иссиқлик тизимини яратиш – мамлакатимизда замонавий ва яшил технологияларга асосланган иссиқлик тизимини шакллантириш, хусусан, иссиқлик насосларидан кенг фойдаланиш масалаларига алоҳида тўхталиб ўтилди.

Музокаралар якунида томонлар ўзаро ҳамкорлик алоқаларини ривожлантириш ҳамда белгиланган мақсадларга эришишда самарали фаолият олиб боришга келишиб олди.