Тошкент, Ўзбекистон (UzDaily.uz) — 2024 йил 5 декабрь куни Олий Мажлис Сенати Раиси Танзила Нарбаева Покистон Ислом Республикасининг Ўзбекистондаги Фавқулодда ва Мухтор Элчиси Аҳмад Фарук билан учрашув ўтказди.

Суҳбат чоғида томонлар Ўзбекистон ва Покистон ўртасидаги икки томонлама муносабатлар барқарор ривожланиб бораётганини, шунингдек, халқаро ва минтақавий ташкилотлар доирасида фаол ҳамкорлик амалга оширилаётганини қайд этди. Олий даражада эришилган келишувларни бажаришга эътибор қаратилди, бу жараёнда парламентлар муҳим ўрин тутиши таъкидланди.

Икки мамлакат ўртасидаги ўзаро манфаатли ҳамкорликни чуқурлаштиришда муҳим ўрин тутадиган парламентлараро алоқаларни янада мустаҳкамлаш масалалари муҳокама қилинди.

Савдо, иқтисодиёт, инвестициялар, транспорт ва туризм каби устувор йўналишларда ҳамкорликни кенгайтириш истиқболларига алоҳида эътибор қаратилди. Томонлар мазкур соҳаларда қўшма лойиҳаларни амалга ошириш иқтисодий алоқаларни мустаҳкамлашга ва ўзаро товар айирбошлаш ҳажмини оширишга хизмат қилишини таъкидлади.

Икки мамлакат халқлари ўртасидаги дўстлик ришталарини мустаҳкамлашга, уларнинг бой тарихий-маданий мероси билан танишишга қаратилган қўшма маданий тадбирларни ўтказиш имкониятлари муҳокама қилингани учрашувнинг муҳим жиҳати бўлди.

Учрашув якунида Ўзбекистон ва Покистон ўртасидаги ҳамкорлик янада мустаҳкамланишига, икки давлат халқлари манфаатлари йўлида белгиланган режалар фаол амалга оширилишига ишонч билдирилди.