Тошкент, Ўзбекистон (UzDaily.uz) — Жорий йилнинг 18 февраль куни Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раисининг ўринбосари Одилжон Маматкаримов Истанбулда бўлиб ўтган Туркий давлатлар Парламент ассамблеяси халқаро ишлар бўйича қўмиталари раисларининг иккинчи йиғилишида иштирок этди.

Шунингдек, тадбирда Туркия, Озарбайжон, Қозоғистон, Қирғизистон, Венгрия, Шимолий Кипр парламентлари аъзолари, Туркий давлатлар Парламент ассамблеяси раиси, Халқаро туркий маданият ташкилоти (Турксой) ва Туркий инвестиция жамғармаси вакиллари ҳам қатнашди.

Йиғилишда туркий давлатлар ўртасида кўп қиррали ва ўзаро манфаатли ҳамкорликни илдам ривожлантиришга, стратегик шерикликни мустаҳкамлаш ва парламентлар ўртасида ишончли муносабатлар ўрнатишга эътибор қаратилди.

Ўзбекистон делегацияси аъзолари таъкидлаганидек, туркий давлатлар раҳбарлари ўртасидаги очиқ ва прагматик муносабатлар икки ва кўп томонлама алоқаларни ривожлантиришда мустаҳкам асос бўлиб хизмат қилади. Тадбирда Ўзбекистон Республикаси Президенти томонидан илгари сурилаётган халқаро ташаббусларда парламент иштирокининг аҳамияти ҳам қайд этилди.  

Ижтимоий-иқтисодий ва сиёсий-ҳуқуқий соҳаларда ҳамкорликни яхшилаш, туркий давлатлар ўртасидаги қўшма лойиҳалар ва келишувларнинг парламент назорати орқали рўёбга чиқарилишини таъминлаш муҳимлигига эътибор қаратилди.

Йиғилиш иштирокчилари халқаро ташкилотлар билан муносабатларни ва парламентлараро алоқаларни мустаҳкамлашга қаратилган саъй-ҳаракатларни давом эттиришга келишиб олди.

Тадбир якунида Туркий давлатлар Парламент ассамблеяси халқаро ишлар бўйича қўмиталари раислари қўшма баёноти қабул қилинди ҳамда Туркий давлатлар Парламент ассамблеясининг халқаро ишлар бўйича қўмиталари раисларининг келгуси учрашувини Қирғизистоннинг Бишкек шаҳрида 2025 йил сентябрь ойида ўтказишга келишиб олинди.