Тошкент, Ўзбекистон (UzDaily.uz) — Бразилиянинг Embraer компанияси 2024 йил 27 декабрда янги, номаълум буюртмачи учун иккита ўрта турдаги C-390 Millennium ҳарбий-транспорт самолётларини етказиб бериш бўйича шартнома тузганини эълон қилди.

Шартнома самолётлар учун эҳтиёт қисмларни етказиб бериш билан бир қаторда, комплекс ўқув ва қўллаб-қувватлаш дастурини ҳам ўз ичига олади.

Самолёт буюртмачиларнинг талабларига мос равишда мослаштирилади. Бу талаблар қуйидагиларни ўз ичига олади: тактик кучларни ва техникани ташиш, гуманитар ёрдам кўрсатиш, фавқулодда вазиятларда бошқарув ва тиббий эвакуация.

Шартнома қиймати ошкор қилинмаган, аммо Embraer портфелига $240 млн қўшилгани ҳақида хабар берган. Бу суммани келишув қиймати сифатида тахмин қилиш мумкин.

Манбаларнинг маълум қилишича, кузатувчилар бу буюртмачи Ўзбекистон бўлиши мумкинлигини тахмин қилмоқда. Чунки 2024 йилда Тошкент ва Embraer ўртасида бу самолётларни сотиб олиш бўйича музокаралар ўтказилган эди, деб хабар беради vpk.name.

Raillynews нашри ҳам эҳтимолий харидор сифатида Ўзбекистонни кўрсатмоқда.

C-390 Millennium кўп мақсадли ҳарбий-транспорт самолёти бўлиб, у юқори ишончлилик, иқтисодий самарадорлик ва универсалликни ўзида жамлаган. У турли вазифалар, жумладан, юк ва шахсий таркибни ташиш, тиббий эвакуация, ҳаво орқали ёқилғи қуйиш ва бошқа ҳарбий миссияларни бажариш учун мўлжалланган. Замонавий технологиялари ва рақобатбардош нархи туфайли, C-390 халқаро харидорлар орасида оммабоп бўлиб қолган.

Ҳозирги вақтгача C-390 самолётлари Португалия, Венгрия, Жанубий Корея, Нидерландия, Австрия ва Чехия каби саккизта давлат томонидан харид қилинган. 2024 йилда Венгрия ва Португалияга йирик етказиб беришлар амалга оширилган бўлса, Нидерландия ва Австрия тўққизта самолёт етказиб бериш бўйича шартнома тузган. Бундан ташқари, Швеция ва Словакия олти ва уч самолёт харид қилишни режалаштириб, шартнома олди келишувлари босқичида турибди.

Агар Ўзбекистон ҳақиқатдан ҳам бу самолётларни харид қилган бўлса, бу C-390ни Марказий Осиё мамлакатлари томонидан илк харид бўлади. Бунинг ўзи Тошкентнинг қуролли кучларни модернизация қилишга бўлган интилишини ва Бразилия билан ҳарбий-техникавий ҳамкорликни мустаҳкамлашга бўлган қизиқишини кўрсатади, дея таъкидлайди ОАВ.