«Ўзгидромет» 3 ноябрдан кескин совуқ тушиши ҳақида огоҳлантирди

Тошкент, Ўзбекистон (UzDaily.uz) —  3 ноябрдан бошлаб Ўзбекистон ҳудудида об-ҳаво шароити кескин ёмонлашиши кутилмоқда, деб хабар берди «Ўзгидромет».

Ушбу куни совуқ ва нисбатан нам ҳаво массаси мамлакатнинг шимолий ҳудудларига кириб кела бошлайди, 4–6 ноябрь кунлари эса бутун республика ҳудудини қамраб олади.

Айрим жойларда ёмғир ёғиши, тоғ олди ва тоғли ҳудудларда эса ёмғир қорга айланиши кутилмоқда.

Ҳаво ҳарорати 4–6 ноябрь кунлари босқичма-босқич пасайиб боради: тунги пайтда 0…+3 °C атрофида бўлиб, айрим жойларда музлаш эҳтимоли бор, кундузги ҳарорат эса +8…+13 °C гача кўтарилади.