Тошкент, Ўзбекистон (UzDaily.uz) — “Shoes & Leather – Guangzhou–2025” халқаро кўргазмасида Ўзбекистон чарм саноати вакиллари нафақат маҳсулотлари билан иштирок этди, балки саноат дипломатиясининг фаол иштирокчисига айланди.

Кўргазма доирасида Хитойнинг етакчи чарм-пойабзал ишлаб чиқарувчилари, ассоциациялар ва дизайн марказлари — YISUN, Chiao Hong Shoes, Guangdong Shoes Association, шунингдек Бангладешнинг The Leather Experts компанияси билан икки томонлама учрашувлар ташкил этилди.

Маҳаллий экспортчилар — DSM International, Top Quality Brand, Nafis Charm каби компаниялар ўз маҳсулотларини намойиш қилди. Хитой, Ветнам, Бангладеш ва Тайваннинг йирик компаниялари маҳсулот сифати, экологик ишлов бериш технологиялари ҳамда ОEM асосидаги ҳамкорлик таклифларига катта қизиқиш билдирди.

Айниқса, кўп йиллик тажрибага эга Guangdong Shoes Manufacturers Association вакиллари билан ўтказилган учрашув муҳим натижалар билан якунланди. Унда «Ўзчармсаноат» уюшмаси билан ҳамкорлик меморандуми имзоланди. Ушбу ҳужжат технологик алмашинув, билим узатиш ва савдо миссияларини мунтазам йўлга қўйишга хизмат қилади.

Кўргазма давомида Ўзбекистон делегацияси қуйидаги йўналишларда музокаралар олиб борди:

янги экспорт алоқаларини йўлга қўйиш;

сифат сертификатларини мувофиқлаштириш;

Осиё бозорларига мос брендлаштириш стратегияларини ишлаб чиқиш.

Ушбу ташриф нафақат маҳсулот тарғиботи, балки Ўзбекистон чарм саноатининг савдо географиясини кенгайтириш ва халқаро ҳамкорлик моделини шакллантириш йўлида муҳим қадамлардан бири бўлди.