Тошкент, Ўзбекистон (UzDaily.uz) — «Ўзбекнефтгаз» ва «Ўзкимёсаноат» АЖлари раҳбарияти «ADCB» банки вакиллари билан мулоқот қилди.

Маълумот ўрнида Абу Дҳаби Соммерсиал Банк- Амирликлардаги учинчи йирик молия муассасаси ҳисобланади.

Учрашувда Жамиятлар томонидан эришилган натижалар, амалга оширилаётган трансформация жараёнлари, Жамиятларнинг иқтисодий барқарорлиги ва лойиҳалар юзасидан амалга оширилаётган ислоҳотлари ҳақида батафсил маълумот берилди.

Музокарада томонлар кредитлаш ҳажмини оширишнинг турли имкониятларини муҳокама қилдилар.

Хусусан, қайта тикланадиган кредит линиясини ташкил этиш ёки томонлар ўртасидаги шартномаларни кенгайтириш орқали банк билан ҳамкорликни янада ривожлантириш масалалари кўриб чиқилди.

Банк мутасаддилари 2025 йилда «Ўзбекнефтегаз» АЖнинг барча фаолият соҳаларида молиялаштиришга ёрдам беришга тайёрлигини билдирди.

Қайд этиш жоизки, «Ўзбекнефтгаз» АЖ ва «ADCB» ўртасидаги алоқалар клуб битимида кредитлаш ва еврооблигациялар чиқариш каби йўналишларда йўлга қўйилган.

Банк еврооблигациялар чиқарилишини баҳолаш, нархни аниқлаш, инвесторларни жалб қилиш, тақдимотларни ташкил этиш, жойлаштириш жараёнини мувофиқлаштириш, тақсимлаш ва инвесторлар билан келишувлар каби муҳим вазифаларни бажаради.

Учрашув якунида томонлар ўзаро ҳамкорликни янада кенгайтиришдан манфаатдор эканликларини билдирдилар.