Тошкент, Ўзбекистон (UzDaily.uz) — "Ўзбекнефтгаз" компанияси Россиянинг "Татнефть", Қозоғистоннинг "ҚазМунайГаз" ва Озарбайжоннинг SOCAR компаниялари билан рақамли технологиялар ва саноат хавфсизлиги соҳасида ҳамкорлик тўғрисида тўрт томонлама меморандумлар имзолади.

Имзолаш маросими Боку шаҳрида бўлиб ўтган "Энергетика соҳасида рақамлаштириш, саноат хавфсизлиги ва харидлар" халқаро конференцияси доирасида ўтказилди.

Ҳужжатга "Татнефть" бош директори Наил Маганов, "ҚазМунайГаз" бошқаруви раиси Асхат Хасенов, "Ўзбекнефтгаз" бошқаруви раиси Баҳодиржон Сидиқов ва SOCAR президенти Ровшан Наджаф имзо чекди.

Меморандумлар рақамли ечимларни ишлаб чиқиш ва жорий этиш бўйича тажриба алмашиш, шунингдек, техноген ҳалокатларнинг олдини олиш ва уларнинг оқибатларини бартараф этиш соҳасида ҳамкорликни назарда тутади.