Ўзбекистоннинг Актаудаги Бош консуллиги: Актау яқинидаги йўл-транспорт ҳодисасида қурбонлар йўқ

Тошкент, Ўзбекистон (UzDaily.uz) — Ўзбекистон Республикасининг Актау шаҳридаги Бош консулхонаси 30 ноябрь куни Қозоғистоннинг Актобе вилоятида содир бўлган йўл-транспорт ҳодисаси ҳақида маълумот эълон қилди.

Расмий маълумотларга кўра, жорий йил 30 ноябрь куни соат 21:00 да “Россия Федерацияси – Актобе – Қизилорда – Алмата” республика аҳамиятига эга автомобиль йўлида “Москва – Тошкент” йўналиши бўйлаб ҳаракатланиб келаётган, давлат рақами 774БОТ13 бўлган «ВанҲоол» русумли йўловчи автобуси йўл-транспорт ҳодисасига учраган.

Ҳодиса вақтида автобусда 54 нафар Ўзбекистон Республикаси фуқароси бўлган. ЙТҲ оқибатида жабрланувчи ва ҳалок бўлганлар йўқ.

Барча йўловчилар фавқулодда вазиятлар хизмати ва полиция ходимлари томонидан Актобе вилояти Айтекеби тумани, Қорабутоқ қишлоғидаги масжидга вақтинча жойлаштирилди. Фуқароларга озиқ-овқат ва зарур ёрдамлар кўрсатилмоқда.

Фуқароларни Ўзбекистонга бошқа автобус орқали тезкор равишда қайтариш чоралари кўрилмоқда.

Вазият Ўзбекистоннинг Қозоғистондаги Элчихонаси ва Бош консуллиги томонидан тўлиқ назоратга олинган бўлиб, Қозоғистон томонининг масъул идоралари билан доимий алоқа ўрнатилган.