Тошкент, Ўзбекистон (UzDaily.uz) — Ўзбекистон Ташқи ишлар вазирлиги матбуот хизмати маълум қилишича, 16 июнь ҳолатига кўра мамлакатнинг 30 дан ортиқ фуқароси Эрондан муваффақиятли равишда эвакуация қилиниб, Ватанга қайтарилди. Улар Туркманистон ва Озарбайжон ҳудудлари орқали транзит йўли билан юборилган.

Ташқи ишлар вазирлиги Туркманистон, Озарбайжон ва Эрон ҳукуматларига ўзбекистонликларни хавфсиз чиқаришда кўрсатилган ёрдам учун миннатдорлик билдирди. Шунингдек, вазирлик хавф даражаси юқори бўлган ҳудудларда, жумладан Эрон ва Исроилда бўлиб турган фуқаролар хавфсизлигини таъминлаш учун барча зарур чораларни кўраётганини маълум қилди. Ўзбекистоннинг ушбу мамлакатлардаги дипломатик ваколатхоналари 24 соатлик иш режимида фаолият юритмоқда.

Айни пайтда ушбу давлатларда бўлиб турган фуқароларимизга хавфсиз жойларда бўлиш, расмий ахборотларни доимий равишда кузатиб бориш ва элчихоналаримиз билан алоқада бўлиш тавсия этилади.

Эслатиб ўтамиз, Ўзбекистон ТИВ аввалроқ Эрон ва Исроил ўртасидаги зиддият кучайгани ва ҳарбий ҳаракатлар бошлангани муносабати билан жиддий ташвиш билдирган ва томонларни зўравонликни тўхтатиб, муаммони сиёсий-дипломатик йўл билан ҳал этишга чақирган эди.

Шунингдек, 16 июнь куни Туркманистон ТИВ маълумот берди: туркман-эрон чегараси орқали Қозоғистон, Қирғизистон, Ўзбекистон, Тожикистон, Руминия ва бошқа давлатлардан тахминан 120 нафар фуқаро эвакуация қилинган. Уларга барча зарур шароитлар — транспорт, озуқа, вақтинча жойлашиш ва биринчи заруриятдаги буюмлар билан таъминлаш хизматлари кўрсатилган.

Алоқа учун маълумотлар:

Ўзбекистоннинг Эрондаги элчихонаси
Тел.: +98 21 22299780, 22832025
Email: iri.uzembassy@mfa.uz

Ўзбекистоннинг Исроилдаги элчихонаси
Тел.: +972 3 672−2466, 672−2371, 758−5075, 758−5076
Шошилинч ҳолатлар учун: +972 54 485−1397
Email: il.uzembassy@mfa.uz