Ўзбекистонлик теннисчи Полина Кудерметова Canberra Challenger турнирининг кумуш медалини қўлга киритди

Тошкент, Ўзбекистон (UzDaily.uz) — Ўзбекистонлик теннисчи Полина Кудерметова Canberra Challenger серияси турнирининг кумуш совриндори бўлди. Ҳал қилувчи финал учрашувида у Тайвань вакили Жоанна Гарландга 4:6, 2:6 ҳисобида мағлуб бўлди.

Финалга чиқиш Кудерметовага 19,7 минг АҚШ доллари миқдоридаги мукофот пули ва WTA рейтинги учун 81 очко келтирди. Турнир ғолибаси эса 33,6 минг доллардан ортиқ мукофот пули ишлаб топиб, рейтингига 125 очко қўшиб олди.

Полина Кудерметова ўтган йил охиридан бери Ўзбекистон шарафини ҳимоя қилиб келмоқда.

Бунга қадар теннисчи Россия байроғи остида иштирок этган. Ўзбекистон терма жамоасига ўтиш пайтида у Аёллар теннис ассоциациясининг жаҳон рейтингида 104-ўринни эгаллаб турган.

Спортчининг мураббийи — машҳур россиялик теннисчи Динара Сафина бўлиб, у аввалроқ 2024 йилги Олимпия ўйинларида жуфтлик баҳсларида кумуш медаль соҳиби бўлган Диана Шнайдер билан ҳам ишлаган.