Тошкент, Ўзбекистон (UzDaily.uz) — 25-28 февраль кунлари Савдо-саноат палатаси раиси ўринбосари Нодира Шотурсунова бошчилигидаги Ўзбекистон тадбиркор аёллари делегациясининг Ўмонга бизнес миссияси ташкил этилди.

Сафар давомида Ўзбекистон-Ўмон бизнес-форуми ҳамда B2B учрашувлар ўтказилди. Унда ўзаро ҳамкорликни йўлга қўйиш бўйича бир қатор келишувларга эришилди. Жумладан:

Маскат шаҳридаги Mall of Oman савдо мажмуасида “Miss Lighting” МЧЖ учун шоурум-савдо дўкони ташкил этиш мақсадида жой ажратилди. Ушбу жойдан 1 йил давомида бепул фойдаланиш имконияти берилди.

Шунингдек, “Dilfuza Design” корхонаси учун ҳам мазкур савдо мажмуасида ўзбек дизайнерларининг либослари шоурумини ташкил этиш мақсадида жой ажратилди. Бундан ташқари, ижара ҳаққи учун махсус имтиёзли шартлар таклиф этилди.

Ўмоннинг “Alsumood” ва “Real Estate Development” қурилиш компаниялари ўз қурган биноларини “Miss Lighting” МЧЖ люстралари билан безатиш бўйича катта миқдорда буюртма беришга келишиб олишди.

“Mediva” клиникасини франшиза асосида Ўмонда очиш бўйича келишувга эришилди.

“Felix Tour” корхонаси раҳбари Bahwan Travel Agencies LLC компанияси билан Ўзбекистонда ички туризмни ривожлантириш мақсадида Ўмондан Ўзбекистонга туристларни юбориш бўйича келишувга эришди.

“Nova School” нодавлат таълим муассасаси раҳбари Ўмон Султонлиги тажрибасини жорий этиш ҳамда ўқитувчилар малакасини ошириш бўйича келишувга эришди.

Жорий йилнинг иккинчи чорагида Ўмон тадбиркор аёлларнинг Тошкентга бизнес миссияни ташкил этиш ва унинг доирасида бизнес-форум ўтказишга келишиб олинди.