Ўзбекистонлик қиличбозлар Осиё чемпионатида кумуш медални қўлга киритди

Тошкент, Ўзбекистон (UzDaily.uz) — Ўзбекистоннинг ёшлар ўртасидаги қиличбозлик бўйича терма жамоаси Индонезиянинг Жакарта шаҳрида ўтаётган Осиё чемпионатида муваффақиятли иштирок этиб, мамлакат медаллар жамғармасини яна бир мукофот билан бойитди.

Ёшлар ўртасидаги қиличбозлик бўйича жамоавий мусобақада ўзбекистонлик спортчилар юқори даражадаги тайёргарликни намойиш этиб, финалга ишонч билан чиқишди. Ҳал қилувчи баҳсга йўл олган жамоа Австралия ва Гонконгдан келган рақибларини мағлуб этди.

Финал учрашувида ўзбекистонлик қиличбозлар Хитой жамоасига ютқазиб қўйишди ва турнир натижаларига кўра қитъа чемпионатида кумуш медалларни қўлга киритишди.

Қўлга киритилган натижа Ўзбекистонда қиличбозлик спорт турининг изчил ривожланаётганини ҳамда миллий терма жамоанинг ёшлар таркиби юқори салоҳиятга эга эканини тасдиқлайди.