Ўзбекистонга 2026 бошидан 1,7 млн турист келди

Тошкент, Ўзбекистон (UzDaily.uz) — Ўзбекистон 2026 йил январь–февраль ойларида туристик мақсадларда келган 1 776 336 нафар хорижий фуқарони қабул қилди. Бу ҳақда 18 март куни Миллий статистика қўмитаси хабар берди.

Ўтган йилнинг шу даврига нисбатан кўрсаткич 441 минг кишига ошган бўлиб, бу 33 фоизлик ўсишни ташкил этади. Туристик оқим 156 та давлат фуқароларини қамраб олган.

Энг кўп ташриф буюрувчилар қўшни давлатлар ҳиссасига тўғри келди. Туристлар сони бўйича етакчи Қирғизистон бўлиб, ушбу мамлакатдан 521 138 нафар фуқаро келган. Кейинги ўринларда Тожикистон — 469 060 нафар ва Қозоғистон — 386 284 нафар турист билан қайд этилди.

Бошқа давлатлар орасида Россиядан 123 310 нафар, Афғонистондан 83 613 нафар ташриф буюрувчи келган. Шунингдек, биринчи ўнталикдан Туркманистон (51 206), Хитой (49 080), Туркия (24 212), Ҳиндистон (9 438) ва Корея Республикаси (5 398) ўрин олган.

Кўрсаткичларнинг ўсиши мамлакатга туристик оқимнинг ортиб бораётганини ва кирувчи туризм географияси кенгаяётганини акс эттиради.