Тошкент, Ўзбекистон (UzDaily.uz) — Ўзбекистонда хорижий юк автомобиллари учун кириш тўловлари ставкалари қайта кўриб чиқилди. Бу ўзгаришлар 2025 йилги давлат бюджети тўғрисидаги қонунга мувофиқ жорий этилди. Асосий ўзгаришлар Туркманистонда рўйхатдан ўтган юк автомобилларига тааллуқли бўлиб, улар учун тўловлар сезиларли даражада оширилди.

2025 йил 1 январдан бошлаб Туркманистондан келадиган транспорт воситалари учун янги ставка белгиланди. Уларнинг массасига қараб: 10 тоннагача бўлган юк машиналари учун $130, 10—20 тонна оралиғида — $180, 20 тоннадан ортиқ — $250. Қиёслаш учун, аввалги ставкалар мос равишда $50, $100 ва $150ни ташкил этар эди.

Қўшимча равишда, учинчи мамлакатлардан юк ташиш ёки Ўзбекистон ҳудудидан юк олиб чиқиш учун тўловлар ҳам оширилди. Туркманистон юк машиналари учун бундай тўлов $175дан $375га кўтарилди.

Европа Иттифоқи ва Озарбайжондан келган транспорт воситалари учун бўлиш муддатига асосланган дифференциялашган тарифлар жорий этилди: 14 кунгача бўлган муддат учун — $80, 14 кундан ошса — $280.

Киришда тўланган тўлов транспорт воситаси чиқиб кетган пайтда унинг мамлакат ҳудудида бўлган вақти асосида қайта ҳисобланиши мумкин.

Шунингдек, хорижий ташувчиларга миллий компаниялар эҳтиёжидан ташқари халқаро юк ташишга рухсатнома бериш учун $400 миқдорида тўлов белгиланди. Транзит ташувлар учун 0,5 коэффициенти қўлланади, учинчи давлатлар билан ташувлар учун эса коэффициент 2га оширилади.

Эрондан келган автотранспорт воситалари учун тўловлар нол даражада ўрнатилди. Бу ўзаро манфаатдорлик принципига асосланган.

Бошқа давлатлар учун ставкалар ўзгаришсиз қолди. Жумладан: Тожикистон юк машиналари учун $100, $150 ва $200, Қозоғистон ва Қирғизистон — $300, Афғонистон — $50, бошқа давлатлар учун — $400.

2024 йил октябрь ойида Ўзбекистон ва Туркманистон транспорт тўловларини паритетли ва шаффоф шартларда ундириш бўйича келишувга эришган эди. 2025 йилдан бошлаб икки давлат миллий ташувчилари учун тўловлар тенглаштирилади.

Шунингдек, электрон рухсатномалар алмашинуви (E-Permit) тизимини жорий этиш режалаштирилган. Бу тизим Туркия ва Қозоғистон билан ҳамкорликда муваффақиятли ишламоқда.