Ўзбекистонда трансмиллий гиёҳвандчилик гуруҳининг фаолияти тўхтатилди: 111 кг гиёҳванд модда мусодара қилинди

Тошкент, Ўзбекистон (UzDaily.uz) — Ўзбекистонда Ички ишлар вазирлиги, Давлат хавфсизлик хизмати ва Божхона қўмитаси томонидан ўтказилган қўшма халқаро операция давомида жами 111 килограмм гиёҳванд моддалар, жумладан 81 килограмм гашиш ва 30 килограмм опий аниқланиб, мусодара қилинди.

Ички ишлар вазирлиги матбуот хизмати маълум қилишича, мазкур операция трансмиллий уюшган гиёҳвандчилик жиноятчилигига қарши курашишга қаратилган. Ҳуқуқни муҳофаза қилувчи идораларнинг ҳамкорликдаги ҳаракатлари натижасида мамлакат ҳудудида фаолият юритган халқаро гиёҳвандчилик гуруҳининг фаолияти фош этилди ва тўхтатилди.

Жиноий уюшманинг олти нафар аъзоси Фарғона, Андижон ва Тошкент вилоятларида қўлга олинди. Жумладан, 13 сентябр куни Фарғона вилоятида маҳаллий фуқаро гиёҳванд моддалар партиясини қабул қилишаётганда ушланди. Андижон вилоятида эса гуруҳнинг икки аъзоси яширин жойдан ўн килограмм гашишни олишга уринган вақтда қўлга олинди.

Яна икки иштирокчи кафеда бир килограмм опийни олти минг долларга сотиб олишга ҳаракат қилган пайтда ушланган. Тошкент вилояти Ангрен шаҳрида эса олдин ҳам судланган шахс беш килограмм опий қабул қилаётган вақтда қўлга олинди.

Вазирлик маълумотларига кўра, трансмиллий гуруҳ бир неча йил давомида Фарғона, Андижон ва Тошкент вилоятлари ҳамда пойтахт ҳудудида гиёҳванд моддалар тарқатиб келган. Аниқланган барча ҳолатлар бўйича жиноят иши қўзғатилди, тергов ҳаракатлари олиб борилмоқда. Ҳуқуқни муҳофаза қилувчи органлар жиноий тармоқнинг қолган иштирокчиларини аниқлаш ва қўлга олиш ишларини давом эттирмоқда.