Тошкент, Ўзбекистон (UzDaily.uz) — 2024 йил ноябрь ойида Ўзбекистонда аёллар саломатлигини мустаҳкамлаш йўналишида стратегик аҳамиятга эга бўлган бачадон бўйни ва кўкрак бези саратонини эрта аниқлаш бўйича гинекологлар учун ўқув дастури ишга туширилди. Мазкур дастур ижросини мониторинг қилиш ва баҳолаш Стратегик ислоҳотлар агентлиги зиммасига юклатилган.

Аёллар орасида онкологик касалликларни назорат қилиш тизимини такомиллаштиришга қаратилган Ўзбекистон Республикаси Президентининг 2024 йил 25 ноябрдаги “Аёллар орасида онкологик касалликларни назорат қилиш тизимини такомиллаштириш чора-тадбирлари тўғрисида”ги ПҚ-402-сонли қарорининг ижросини таъминлаш доирасида Стратегик ислоҳотлар агентлиги томонидан «Юта» университетининг (АҚШ) етакчи мутахассислари билан ҳамкорлик йўлга қўйилиб, Республика ихтисослаштирилган она ва бола саломатлиги илмий-амалий тиббиёт марказининг филиалларида фаолият олиб борадиган шифокорларни колпоскопия бўйича ўқитиш курслари ташкил этилди.

Колпоскопия бачадон бўйни саратони ёки прекансероз касалликларни аниқлаш учун ишлатиладиган муҳим диагностика усули ҳисобланиб, ушбу усул бачадон бўйни саратони скрининг жараёнининг асосий босқичидир. Ҳозирга кунда Ўзбекистонда кам сонли мутахассислар халқаро миқёсда тан олинган колпоскопия сертификатига эга бўлиб, ушбу тренинг нафақат иштирокчиларга халқаро сертификатни тақдим қилади, балким саратон ташхисини такомиллаштиришда муҳим қадам ҳисобланади.

Мураббийларга амалий машғулотлар учун замонавий муляжлар ва ускуналар тақдим этилиб, ўқув жараёнининг имкон қадар самаралилиги таъминланди. Ўқув дастури 4 та ўқув босқичдан иборат бўлади ва шифокорларнинг билим ва амалий кўникмалари оширилади. Барча босқичлар тугагач ҳамда муваффақиятли сертификатлашдан ўтилгандан сўнг иштирокчилар Саратонга қарши кураш халқаро гинекологлар ассоциацияси сертификати тақдирланади. Таъкидлаш жоизки, маҳаллий шифокорлар олган билимларини ўз ҳамкасбларига ўргатади ва олинган малакаларини бутун мамлакат бўйлаб тарқатиш имконияти яратилади.

Тренинг якунида «онконазорат» кабинетларида гинеколог шифокорларни тайёрлайдиган 20 нафар миллий даражадаги уста-мураббиялар малакаси оширилади.

Тренинг АҚШнинг «Юта» университети, Стратегик ислоҳотлар агентлиги, Соғлиқни сақлаш вазирлиги, Республика ихтисослаштирилган она ва бола саломатлиги илмий-амалий тиббиёт маркази кўмагида ташкил этилди. Мутахассисларнинг ташрифини “Стирлинг Фоундатион” жамғармаси томонидан молиялаштирди.

Ўзбекистон Республикаси Президентининг ПҚ-402-сонли қарорининг асосий мақсадлари қуйидагилардан иборат:

Саратонни эрта аниқлаш тизимини ишлаб чиқиш. Аёллар орасида саратон касаллигини скрининг, диагностика ва даволаш усулларини такомиллаштириш.

Шифокорлар малакасини ошириш. Қарорда тиббиёт ходимларини, айниқса, гинеколог ва бошқа мутахассисларни саратон касаллигини аниқлашнинг замонавий усуллари, масалан, колпоскопия ва бошқа скрининг усулларига ўргатиш.

Халқаро ҳамкорлик. Қарор доирасида халқаро мутахассислар ва ташкилотлар билан ҳамкорлик алоқалари ўрнатиб, Ўзбекистонда онкология соҳасида мутахассисларнинг кўникмалари ва тажрибаси ошириш.

Инфратузилмани мустаҳкамлаш. Мавжуд соғлиқни сақлаш муассасаларини модернизация қилиш, уларни саратон касалликларини эрта аниқлаш учун зарур воситалар ва техник жиҳозлар билан таъминлаш.

ПҚ-402-сонли қарор Ўзбекистонда аёллар саломатлигини яхшилашга ҳамда онкологик касалликларнинг олдини олиш ва эрта ташхис қўйиш тизимини яратишга, онкологик касалликларни ўз вақтида аниқлашга ва муваффақиятли даволаш имкониятларини сезиларли даражада оширишга қаратилган.