Ўзбекистонда шаҳарсозликни бош режалаштириш бўйича ўқув курси якунланди

Тошкент, Ўзбекистон (UzDaily.uz) — Европа Иттифоқи томонидан молиялаштирилаётган ҳамда БМТ Тараққиёт Дастури ва Адлия вазирлиги томонидан амалга оширилаётган “Ўзбекистонда давлат хизматлари кўрсатишни янада такомиллаштириш” лойиҳаси доирасида Мастер режа ишлаб чиқиш бўйича тренерлар учун тренинг (ТоТ) ўз ишини бошлади.

Мазкур тренинг ҳудудий ривожланиш амалиётларини модернизация қилиш ва бутун Ўзбекистон бўйлаб халқаро стандартларни жорий эта оладиган миллий экспертлар корпусини шакллантиришни мақсад қилган.

Тадбир дастури мутахассисларни замонавий шаҳарсозлик ёндашувларини ишлаб чиқиш ва амалга ошириш учун зарур амалий воситалар билан таъминлаш орқали инклюзив ва барқарор шаҳар ривожланишини қўллаб-қувватлашга йўналтирилган.

Ўқув дастури илғор техник мавзуларни, жумладан, иқтисодий моделлаштиришни шаҳар режалаштириш тизимларига интеграция қилувчи фазовий-иқтисодий таҳлил ҳамда транспорт, туризм ва маданий мерос йўналишларини мувофиқлаштиришга қаратилган кўп тармоқли интеграцияни қамраб олади.

Шунингдек, иштирокчилар назарий билимларни амалиётда қўллаш мақсадида жойларга ташриф буюриб, замонавий шаҳарсозлик жараёнлари билан танишиш имкониятига эга бўладилар.

Тренинг шаҳар ривожлантириш стратегияларини маҳаллий аҳоли учун фойдали бўлган аниқ лойиҳаларга айлантириш йўлидаги муҳим қадам ҳисобланади. Тадбир малакали тренерлар тармоғини шакллантириш орқали замонавий, аввало инсон манфаатларига хизмат қиладиган шаҳарсозлик ёндашувларини мамлакатнинг барча ҳудудларида кенг жорий этишга хизмат қилади.

“Европа Иттифоқи Ўзбекистоннинг барқарор шаҳар ривожланиши ва замонавий бошқарув сари йўлида қўллаб-қувватлашдан мамнундир. Ушбу тренинг маҳаллий мутахассисларни ўз жамоалари эҳтиёжларига жавоб берадиган, инклюзив ва барқарор шаҳарларни шакллантиришга тайёрлашга qaratilgan... мазкур ташаббус Европа Иттифоқининг Глобал Гатевай стратегияси доирасидаги умумий қарашларимизни акс эттиради,” — деди Европа Иттифоқининг Ўзбекистондаги Делегацияси биринчи маслаҳатчиси ва Ҳамкорлик бўлими раҳбари Христос Маразопулос.

Уч кун (2–4 апрель кунлари) давомида иштирокчиларнинг замонавий шаҳарсозлик бўйича амалий кўникмалари, жумладан фазовий маълумотлардан фойдаланиш, ГИС воситалари ҳамда Ўзбекистонда Мастер режа ишлаб чиқиш ва тасдиқлаш жараёнлари бўйича билимлари мустаҳкамланади.

Иқтисодиёт ва молия вазирлиги сўровига биноан халқаро экспертлар бошчилигида ўтказилаётган ушбу тренинг режалаштириш амалиётидаги муҳим бўшлиқларни бартараф этиш билан бирга иқлимга мослашувчан ва инклюзив ёндашувларни илгари суради.

Миллий даражада тренерлар захирасини шакллантириш орқали ташаббус мамлакатнинг барча ҳудудларида шаҳар ривожланиши сифатини ва изчиллигини оширишга хизмат қилади.