Тошкент, Ўзбекистон (UzDaily.uz) — Ўзбекистон 2025 йилнинг илк икки ойида 1,73 миллиард долларлик олтин экспорт қилди. Бу ҳақда Миллий статистика қўмитаси маълумотларида қайд этилган.

Ўтган йилнинг шу даврига нисбатан олтин етказиб бериш ҳажми 31,3%га ошган, 2024 йилнинг январь-февраль ойларида бу кўрсаткич 1,32 миллиард долларни ташкил этган эди.

Олтиннинг мамлакат умумий экспорт ҳажмидаги улуши ҳам ортиб, 36,3%дан 37,3%га етди.

Ҳисобот даврида Ўзбекистоннинг ташқи савдо айланмаси (ТСА) 10,8 миллиард долларга етди, бу ўтган йилнинг шу даврига нисбатан 973,3 миллион доллар ёки 9,9%га кўпдир.

Жумладан, экспорт ҳажми 4,64 миллиард долларни ташкил этди, бу 2024 йилнинг январь-февраль ойларига нисбатан 27,7%га юқоридир. Шу билан бирга, импорт 0,6%га камайиб, 6,2 миллиард долларни ташкил этди. Натижада, ташқи савдо баланси манфий кўрсаткичда қолиб, 1,56 миллиард долларлик камомад қайд этилди.