Ўзбекистонда метан қуйиш шохобчалари 23 декабрь куни олти соатлик графикда ишлайди

Тошкент, Ўзбекистон (UzDaily.uz) — Ўзбекистонда автомобиль газ тўлдириш компрессор станциялари 23 декабрь куни одатий режимда фаолиятини давом эттиради, дея хабар қилди Энергетика вазирлиги матбуот хизмати.

Вазирлик маълумотларига кўра, сешанба куни мамлакат бўйлаб метан қуйиш шохобчалари олти соат — соат 10:00 дан 16:00 гача очиқ бўлади. Худди шу тартиб бир кун олдин ҳам амал қилган.

Фарғона водийсида АГНКСларнинг иш жадвали алоҳида тартибда — вилоят ҳокимиятлари билан келишилган ҳолда ва газ тизимидаги босим даражасини ҳисобга олган ҳолда белгиланади.

Энергетика вазирлигида тушунтирилишича, газ босими пасайган шароитда табиий газ билан аҳолини, жамоат транспортини ва ижтимоий соҳа объектларини таъминлаш устувор ҳисобланади.

«таъминотидаги умумий ҳолат, босим даражаси ва истеъмол ҳажмидан келиб чиққан ҳолда “метан заправкалар”нинг иш режими маҳаллий ҳокимликлар билан келишилади. Бу чора газ ресурсларидан оқилона фойдаланиш ва барча соҳаларда барқарор таъминотни таъминлаш мақсадида амалга оширилади», — дея қайд этилди вазирликда.

Мамлакат бўйлаб АГНКСлар фаолиятига чекловлар 11 декабр куни жорий этилган эди. Ўшанда Энергетика вазирлиги Туркманистон газ транспорт тизимидаги носозлик сабабли газ импорти қисқарганини маълум қилиб, кўрилган чоралар вақтинчалик эканини таъкидлаган.

Энергетика вазири Жўрабек Мирзамахмудов аввалроқ ушбу авария суткалик тахминан 6 миллион куб метр газ танқислигига олиб келганини билдирган эди. Вазирнинг сўзларига кўра, вазиятни юмшатиш мақсадида Фарғона водийсида стационар метан қуйиш шохобчалари ёпиқ бўлган даврларда объектларга хизмат кўрсатиш учун мобиль газ тўлдириш станцияларини жалб этиш режалаштирилмоқда.