Тошкент, Ўзбекистон (UzDaily.uz) — 19 февраль куни Тошкент шаҳрида минтақа етакчи лоукостерларидан бири бўлган Flynas авиакомпаниясининг янги сотув офисининг расмий очилиш маросими бўлиб ўтди.

Тадбирда Саудия Арабистонининг ҳаҗ ва умра вазири Тавфик Аль-Рабиа, Flynas вице-президенти Абдулилах Алэади ва авиакомпаниянинг расмий делегацияси, шунингдек, Ўзбекистон Транспорт вазирлиги, Маданият вазирлиги ва Диний ишлар бўйича қўмитаси вакиллари, 12 та лицензияга эга ҳаҗ ва умра сафарларини ташкил қилувчи компаниялар раҳбарлари ҳамда мамлакатнинг етакчи туроператорлари иштирок этди.

Ўзбекистонда Flynas авиакомпаниясининг бош савдо агенти сифатида B2 MANAGEMENT компанияси фаолият юритиб, икки мамлакат ўртасида туризм ва авиақатнов соҳасида ҳамкорликни ривожлантиришга ҳисса қўшмоқда.

Ташкилотчилар таъкидлаганидек, Тошкентда офиснинг очилиши Ўзбекистон ва Саудия Арабистони ўртасидаги авиация ҳамкорлигини мустаҳкамлашда муҳим воқеа бўлди. Flynas авиакомпанияси қулай ва мақбул нархлардаги парвозларни таклиф этади, бу эса ҳаҗ ва умра зиёратини амалга ошираётган зиёратчилар, шунингдек, маданий ва ишбилармонлик туризми билан қизиқувчи сайёҳлар учун айни муддао.

Тадбир давомида авиақатновни ривожлантириш истиқболлари ва икки мамлакат ўртасидаги иқтисодий ва маданий алоқаларни мустаҳкамлаш масалалари муҳокама қилинди.