Тошкент, Ўзбекистон (UzDaily.uz) — Ўзбекистонда енгил саноатни ривожлантириш агентлиги ташкил этилади. Бу ҳақда Президент Шавкат Мирзиёев экспорт имкониятлари ва тўқимачилик тармоғининг захираларидан фойдаланишга бағишланган видеоселектор йиғилишида маълум қилди.

Таъкидланишича, жаҳон савдо қоидаларидаги тезкор ўзгаришлар ва логистикадаги узилишлар шароитида тўқимачилик соҳасини ривожлантиришга махсус ёндашув зарур. Янги агентлик тўқимачилик, чарм ва ипак саноатини қўлга олади.

Вазирликнинг биринчи ўринбосари Нозимжон Холмурадов агентлик раҳбари этиб тайинланди.

Агентлик ҳузурида тажрибали тадбиркорлардан иборат кенгаш, шунингдек, енгил саноат корхоналарига давлат ёрдами ва арзон айланма маблағлар тақдим этиш учун махсус жамғарма ташкил этилади.

Жамғарма шакллантириш учун 200 миллион доллар ажратилган.

Янги агентликка кенгаш ва тадбиркорлар билан ҳамкорликда доимий мулоқот олиб бориш, маҳсулот таннархини пасайтириш, ишлаб чиқариш ва экспорт ҳажмини ошириш бўйича ечимлар ишлаб чиқиш вазифаси юклатилди.

“Божхона ҳудудида қайта ишлаш” тартибини қўллаш орқали тайёр маҳсулот экспортини икки баробар ошириш режалаштирилган. Шунингдек, кооперацияни кучайтириш ва қуввати паст корхоналарни соғломлаштириш чораларини кўриш вазифаси қўйилди.

Халқаро маслаҳатчилар билан ҳамкорликда тўқимачилик соҳасини 2030 йилгача ривожлантириш дастурини ишлаб чиқиш, шунингдек, чарм, ипак ва гиламчилик саноатини ривожлантириш бўйича таклифлар тайёрланади.