Тошкент, Ўзбекистон (UzDaily.uz) — Ўзбекистонда бирламчи тиббий ёрдам тизими босқичма-босқич трансформация қилинади. Бу жараён 2025 йилги Давлат дастури доирасида амалга оширилади ва оилавий поликлиникалар, оилавий шифокорлар пунктлари ҳамда маҳалла тиббиёт пунктларида самарали тиббий хизмат кўрсатиш моделини яратишга қаратилган.

Ислоҳотнинг асосий йўналишларидан бири кўп тармоқли марказий поликлиникаларни марказий шифохоналар қошидаги консультация-диагностика марказларига айлантиришдир.

Шунингдек, марказлашган лабораториялар ташкил этиш, шифокор қабуллари учун навбатларни тўлиқ рақамлаштириш ва стоматологик хизматларни хусусий секторга ўтказиш режалаштирилган. Бунда санитария-гигиена қоидаларига давлат назорати кучайтирилади.

Тиббий ходимларнинг профессионал даражасини оширишга алоҳида эътибор қаратилади. Улар иш самарадорлигини баҳолаш мезонлари ишлаб чиқилади ва юқори кўрсаткичларга эришган ходимларга ҳар ой қўшимча тўловлар тайинланади.

Ислоҳот доирасида жорий йилда вилоят даражасидаги ихтисослаштирилган тиббий муассасалар кўп тармоқли клиникаларга айлантирилади. Улар замонавий бошқарув, молия ва ташкилотчилик механизмларини жорий этади. Бундан ташқари, беморларга сифатли тиббий хизмат кўрсатиш учун ётқизиш жойлари сони оширилади.

Соғлиқни сақлаш вазирлигига 1 июлгача тиббий ва фармацевтика ходимларини давлат рўйхатидан ўтказиш тизимини босқичма-босқич жорий этиш механизмларини назарда тутувчи меъёрий-ҳуқуқий ҳужжат лойиҳасини тайёрлаш вазифаси юклатилди.

Шунингдек, Рақамли технологиялар вазирлиги Соғлиқни сақлаш вазирлиги билан ҳамкорликда 1 ноябргача тиббий суғурта жорий этилган ҳудудларда «Электрон рецепт» тизимидан фойдаланган ҳолда дори воситаларини тайинлаш амалиётини жорий этишлари лозим.