Тошкент, Ўзбекистон (UzDaily.uz) — 25-26 февраль кунлари Better Cotton билан ҳаморкликда Ўзбекистон пахта ишлаб чиқарувчилари учун барқарорлик бўйича миллий анжуман ташкил этилди.

Тадбирда Better Cotton раҳбарияти, Одам савдосига қарши курашиш ва муносиб меҳнат масалалари бўйича Миллий комиссия, Ўзтўқимачиликсанаот уюшмаси раҳбарияти ва вакиллари, давлат идоралари, халқаро ташкилотлар, тўқимачилик корхоналари ҳамда илмий доиралар иштирок этди.

Тадбир давомида пахта ишлаб чиқаришнинг барқарорлиги бўйича тадқиқот натижалари тақдим этилди. Экспертлар томонидан асосий хулоса ва тавсиялар эълон қилинди. Муҳокамалар чоғида қуйидаги муҳим масалалар кўриб чиқилди:

• Саноатни янада ривожлантириш учун сиёсий ва институционал ислоҳотлар
• Фермер хўжаликларини молиявий қўллаб-қувватлаш имкониятлари
• Инновацион технологиялар ва инфратузилмани ривожлантириш
• Бозор рақобатбардошлигини ошириш

Тадбир доирасида хорижий экспертлар ўз тажрибалари билан ўртоқлашдилар ва Ўзбекистон пахта етиштириш жараёнининг барқарорлигини таъминлаш бўйича стратегик таклифлар илгари сурилди.

Миллий маслаҳатлашув якунида иштирокчилар келгусидаги ҳамкорлик ва барқарор ривожланиш йўналишларини белгилаб олдилар.