Ўзбекистонда 15–17 ёшли қизлар ўртасида 155 та эрта никоҳ ҳолати қайд этилди

Тошкент, Ўзбекистон (UzDaily.uz) — 2025 йил бошидан буён Ўзбекистонда 15–17 ёшли қизлар ўртасида 155 та эрта никоҳ ҳолати аниқланган.

Бу ҳақда Соғлиқни сақлаш вазири Асилбек Худаяров 14 октябрь куни давлат раҳбари иштирокида бўлиб ўтган маҳаллаларни ривожлантириш масалаларига бағишланган йиғилиш якунлари бўйича «Ўзбекистон 24» телеканалига берган интервьюсида маълум қилди.

Вазирнинг сўзларига кўра, давлат раҳбари ёшлар, айниқса қизлар орасидаги эрта никоҳ ҳолатларидан жиддий хавотир билдирган ҳамда мамлакатда ҳануз қариндошлар ўртасида никоҳлар учраб тураётганини таъкидлаган. «Замонавий тиббиёт эрта никоҳлар ва қариндошлар ўртасидаги никоҳлар ногирон фарзанд туғилиши хавфини кескин оширишини исботлаган», — деди Худаяров.

Соғлиқни сақлаш вазири шунингдек, йиғилишда бир календарь йили давомида аёллар икки марта ҳомиладор бўлган ҳолатлар муҳокама қилинганини билдирди. Бунинг сабаби туғруқлар орасида зарур танаффусга амал қилинмагани бўлиб, натижада заиф ва касал болалар дунёга келаётгани таъкидланди.

«Президент шундай ҳолатларни олдини олиш ва Янги Ўзбекистонни қуришда иштирок этадиган соғлом авлод туғилишини таъминлаш учун жойлардаги соғлиқни сақлаш тизими ходимлари маҳалла қўмиталари, аёллар қўмиталари, диний арбоблар ва маҳаллий ҳокимиятлар билан ҳамкорликда ўз вазифаларига янада масъулият билан ёндашишлари лозимлигини таъкидлади», — дея қўшимча қилди вазир.

Худаяровнинг таъкидлашича, бу масала бўйича кенг кўламли ахборот-маърифий ишлар олиб борилади.

Унинг сўзларига кўра, бундай ҳолатлар такрорланса, улар маҳалла даражасида муҳокама этилади ҳамда уларнинг олдини олиш бўйича зарур чоралар кўрилади.